İyulun 2-də Ayasofiya üçün keçirilən məhkəmə prosesindən sonra Dövlət Müşavirliyi (Danıştay) 10-cu departamenti bu gün öz qərarını açıqlayıb. Departament, Ayasofiyanı muzeyə çevirən 24 noyabr 1934-cü il tarixli Nazirlər Kabineti qərarını ləğv edib. Bununla da Ayasofiyanın yenidən məscid statusuna qovuşmasının yolu açılıb.
Dövlət Müşavirliyinin 10-cu Departamenti bu addımını, Ayasofiyanın Fateh Sultan Mehmet xanın mülkiyyətində olması və məscid kimi ictimaiyyətin xidmətinə verməsi ilə əsaslandırıb.
Xatırladaq ki, 1453-cü ildə II Məhmədin İstanbulu fəth etməsi ilə məscidə çevrilən Ayasofiya 1931-ci ildə ibadətə bağlanıb, 1934-cü ildə isə Nazirlər Kabinetinin qərarı ilə muzeyə çevrilib. Daha əvvəl həmin qərarın ləğv edilməsi üçün göstərilən bütün cəhdlər nəticəsiz qalmışdı.
2016-cı ildə isə “Vəqflər Tarixi Əsərlərə və Ətraf Mühitə Xidmət” dərnəyi həmin qərarın ləğv edilməsi üçün yenidən məhkəməyə müraciət edib. Məhkəmə, iyulun 2-də bu müraciəti müzakirə edəcəyini və yekun qərar verəcəyini açıqlamışdı.
