Son vaxtlar mütəxəssislərin, zeytun yarpaqlarını dəmləyib içmək kovidə qarşı faydalıdır – deməsi insanların bu istiqamətdə diqqətini cəlb edib.
Türkiyə Bursa vilayətinin İznik rayonundakı zeytun bağlarından birində qəribə hadisə baş verib.
Bağın sahibi Veysəl Çil zeytun ağaclarından birinin budağından içində pul və qeyd olan bağlama tapıb.
Çil qeyddə, “Yarpaqlardan biraz götürməyə məcbur oldum. Ailəm koronaya yoluxub. Haqqınızı halal edin.” – yazıldığını və bağlamaya 150 lirə (33 manat) pul qoyulduğunu bildirib.
Veysəl Çil həmçinin, “Haqqım axıra qədər halal olsun. Heç pul qoymaq da lazım deyildi. Əgər dərdlərinə çarə olacaqsa ağacı kökündən çıxarıb aparsınlar.” – deyib.
