Bildirilib ki, türklərin və müsəlmanların sıx yaşadığı Almaniyanın Köln şəhərində 2 ildir pilot layihə olaraq həyata keçirilən “bəzi şərtlər yerinə yetirilmək şərti ilə cümə günləri günorta azanının səsgücləndiricilərlə oxunması” davam edəcək.
Alman mətbuatının Böyükşəhər Bələdiyyəsinə istinadən verdiyi xəbərə görə, 2 illik qiymətləndirmə prosesinin sonunda məscid rəhbərliyi ilə razılaşdırılmış şərtlər pozulmadığı üçün imzalanan müqavilənin qeyri-müəyyən müddətə uzadılacağı bildirilib.
Kölndə 2022-ci ilin oktyabr ayından etibarən cümə günləri “saat 12.00-15.00 arasında 5 dəqiqədən çox olmamaq və qonşuları narahat etməmək”, yəni “bir kilsə zənglərində olduğu kimi müəyyən həcmdə”günorta azanları səsgücləndirici ilə oxunur.
Bənzər bir təcrübə təxminən 37 ildir Düren məscidində və uzun illərdir Şimali Almaniyadakı Rendsburq məscidində həyata keçirilir.
Almaniyada təkcə DİTİB-ə bağlı 900-ə yaxın məscid var.
