Azərbaycan prezidenti İlham Əliyev Türkiyə prezidenti Rəcəb Tayyib Ərdoğana 13 mülki vətəndaşın terrorçular tərəfindən qətlə yetirməsinə görə başsağlığı verib.
Başsağlığında deyilir:
Hörmətli cənab Prezident,
Əziz Qardaşım,
Xain terror aktı nəticəsində Türkiyə vətəndaşları olan 13 günahsız mülki şəxsin qəddarcasına qətlə yetirilməsi xəbəri bizi olduqca sarsıtdı.
Biz dinc insanlara qarşı yönəlmiş bu dəhşətli terror əməlindən hədsiz dərəcədə hiddətlənir, terrorizmin bütün təzahürlərini qətiyyətlə pisləyirik.
Baş vermiş bu faciə ilə əlaqədar Sizə, qətlə yetirilənlərin ailələrinə və yaxınlarına, qardaş Türkiyə xalqına şəxsən öz adımdan və Azərbaycan xalqı adından dərin hüznlə başsağlığı verirəm.
Allah rəhmət eləsin!
İlham Əliyev
Azərbaycan Respublikasının Prezidenti
Bakı, 14 fevral 2021-cı il.
Xatırladaq ki, Türkiyə Silahlı Qüvvələrinin Şimali İraqın Gara bölgəsində PKK terrorçularına qarşı keçirilən əməliyyatı vaxtı mağaradan 13 Türkiyə vətəndaşının terrorçular tərəfindən qəddarcasına qətlə yetirilmiş cəsədi aşkarlanıb.
