Dekabrın 18-də Müdafiə Nazirliyinin Sumqayıt şəhərində yerləşən “N” saylı hərbi hissəsində maarifləndirmə tədbiri keçirilib.
Tədbirdə ilk öncə Dövlət Komitəsinin sifarişi ilə çəkilmiş “Şəhadət” sənədli filmi nümayiş olunub.
Daha sonra çıxış edən DQİDK sədrinin müavini Səyavuş Heydərov dini radikalizmi doğuran səbəblərdən, radikalizmlə mübarizədə maarifləndirmə işinin önəmindən bəhs edib. Sədr müavini radikalizmi doğuran başlıca səbəblərdən biri kimi dinlərin mahiyyətinin təhrif olunduğunu qeyd edib. Onu da vurğulayıb ki, İslam dini haqqında bilgiləri zəif olan insanların radikal cərəyanlara, qruplara cəlb edilməsi daha asan olur. Ona görə də dini radikalizmlə mübarizədə ilk növbədə dini maarifçilik işinin təşkilinə xüsusi önəm verilməlidir. Səyavuş Heydərov diqqətə çatdırıb ki, bütün fəaliyyətimizin hədəfi milli və islami dəyərlərimizin qorunmasına və təbliğinə yönəlib. Bu cür maarifçilik tədbirləri cəmiyyətin bütün təbəqələrini əhatə edir, o cümlədən hərbi hissələrdə təşkil olunur.
“Şəhadət” sənədli filminin çəkilməsini zəruri edən amillərə toxunan sədr müavini filmin dini maarifləndirmə işindəki əhəmiyyətindən danışıb.
Sonda hərbçiləri maraqlandıran suallar cavablandırılıb.
