Türkiyənin Sosial Müdafiə Qurumunun (SGK) sədri Cevdet Ceylanın rəhbərlik etdiyi nümayəndə heyəti Azərbaycana işgüzar səfərə gəlib.
Səfər çərçivəsində İcbari Tibbi Sığorta üzrə Dövlət Agentliyinin (Agentlik) İdarə Heyətinin sədri Zaur Əliyev SGK-nın sədri Cevdet Ceylanın rəhbərlik etdiyi nümayəndə heyəti ilə görüşüb.
Nümayəndə heyətində SGK-nın Ümumi Tibbi Sığorta Baş İdarəsinin rəhbəri Gökhan Tuna Öztürk, idarənin Səhiyyə Xidmətləri departamentinin rəhbəri Eyup Sabri Tezcan, sosial müdafiə ekspertləri Tolga Bal və Yusuf Demirci təmsil olunur.
Z.Əliyev iki qardaş ölkə arasında əməkdaşlığın bütün istiqamətlərdə olduğu kimi səhiyyə və tibb sahələrini də əhatə etdiyini bildirib: “Qardaş ölkə həkim mütəxəssislərin müxtəlif ixtisaslar üzrə təhsil almasına, bilik və bacarıqlarının artmasına hər zaman böyük töhfə verir. Bu da əlbəttə ki, səhiyyənin inkişafı ilə yanaşı iki qardaş ölkə arasında əlaqələrin daha da möhkəmlənməsində mühüm rol oynayır”.
Ötən il imzalanan Anlaşma Memorandumunun iki qurum arasında əlaqələrin daha da inkişaf etdirilməsi baxımından vacib olduğunu bildirən İdarə Heyətinin sədri işgüzar səfərin məhsuldar keçməsi üçün nümayəndə heyətinə hər cür dəstək olmağa hazır olduğunu vurğulayıb.
C.Ceylan isə Türkiyədə əhalinin sağlamlığının qorunması istiqamətində görülən tədbirlər barədə məlumat verib: “2012-ci ildən tətbiq etməyə başladığımız icbari tibbi sığorta ilə biz cəmiyyətin bütün üzvlərinin iqtisadi gücündən və istəyindən asılı olmayaraq tibbi xidmətlərdən bərabər, əlçatan və effektiv faydalanmasını təmin edirik. Bunun nəticəsidir ki, Türkiyədə əhalinin 99%-i universal tibbi sığorta ilə əhatə olunur.”
O əlavə edib ki, öz ölkəsinin sözügedən sahədə əldə etdiyi 10 illik təcrübəsini qardaş ölkə ilə bölüşəcəyindən məmnundur.
Qeyd edək ki, Anlaşma Memorandumu çərçivəsində imzalanan 3 illik fəaliyyət planının builki mövzusu “İcbari tibbi sığortanın maliyyələşdirilməsi və informasiya texnologiyalarının tətbiqi”dir. Fevralın 10-dək davam edən səfər müddətində nümayəndə heyəti mövcud qanunverici baza, qurumların aktuar balansları, sığortahaqqının müəyyən edilməsi, həvəsləndirici əlavələrin tətbiqi ilə bağlı məlumat əldə edəcəklər. Fəaliyyət Planının icrası məqsədi ilə görülən tədbirlər çərçivəsində icbari tibbi sığortanın tətbiqinin Türkiyə təcrübəsinə əsaslanaraq təkmilləşdirilməsinə dair təkliflər hazırlanacaq.
Report
